ԱՎՐՈՐԱՆ՝ ԱՐՑԱԽԻՆ

2020 թ. սեպտեմբերի 27-ին Ադրբեջանը Թուրքիայի աջակցությամբ պատերազմ սկսեց Արցախի դեմ, որի հետեւանքով տուժեցին հազարավոր մարդիկ։ 90.000 մարդ ստիպված եղավ լքել իր տունը: «ԱՎՐՈՐԱՆ՝ Արցախին» ծրագիրը մեկնարկեց 2020 թ. նոյեմբերին՝ օգնության ձեռք մեկնելու այս պատերազմի հետեւանքով մարդասիրական լուրջ ճգնաժամի առաջ կանգնած երեխաներին ու մեծահասակներին: Ի սկզբանե ուղղված լինելով պատերազմից տուժած մարդկանց հրատապ օժանդակություն տրամադրելուն՝ ավելի ուշ ծրագիրն սկսեց աջակցել հիմնականում այնպիսի նախագծերի, որոնք խթանում են տարածաշրջանի սոցիալական երկարաժամկետ զարգացումը:

2020 թ. նոյեմբերից «ԱՎՐՈՐԱՆ՝ Արցախին» ծրագիրն իրականացվում է #AraratChallenge համաշխարհային շարժման միջոցով, որն ուղղված է մարդասիրական կարիքների բավարարմանը Հայաստանում եւ աշխարհասփյուռ հայ համայնքներում:

Ըստ «Ավրորա» մրցանակի նոր ռազմավարության՝ այն մրցանակի ֆոնդի մի մասն ուղղում է աշխարհի ամենասուր մարդասիրական ճգնաժամերից մեկի հաղթահարմանը, որտեղ մարդկային տառապանքը պահանջում է անհապաղ միջամտություն: Հաշվի առնելով արցախցիների խիստ կարիքները՝ 2021 թ. «Ավրորա» մրցանակի դափնեկիր Ջուլիեն Լուսենգեն իր 1.000.000 ԱՄՆ դոլար մրցանակի միջոցներից 250.000 (25%) ԱՄՆ դոլար ուղղեց Արցախի մարդասիրական հրատապ խնդիրների հաղթահարմանը: «Ավրորայի» համահիմնադիրները կրկնապատկեցին այդ նվիրատվությունը՝ գումարի չափը հասցնելով 500.000 ԱՄՆ դոլարի:

Ծրագրի մեկնարկից ի վեր՝ «Ավրորան» 2.2 մլն ԱՄՆ դոլար է հատկացրել՝ աջակցելով 93 նախագծի, որոնք իրագործվել են  տեղի եւ միջազգային 70 գործընկերների կողմից: Սա ներառում է նաեւ 1 մլն ԱՄՆ դոլար նվիրատվությունը, որը տրվեց «Հայաստան» համահայկական հիմնադրամին՝ աջակցելու պատերազմից տուժած մարդկանց օգնելու նրանց ջանքերին: «ԱՎՐՈՐԱՆ՝ Արցախին» ծրագիրն ավարտվեց 2023 թ. հունիսի 30-ին:

«ԱՎՐՈՐԱՆ՝ ԱՐՑԱԽԻՆ» ԾՐԱԳԻՐՆ ՕԳՆԵԼ Է ԱՎԵԼԻ ՔԱՆ 150.000 ՄԱՐԴՈՒ: ՆՐԱՆՑԻՑ ՇԱՏԵՐԸ ՄԻ ՔԱՆԻ ԾՐԱԳՐԻ ՇԱՀԱՌՈՒ ԵՆ: