ԷԿՈՀԱՄԱԿԱՐԳԱՅԻՆ ՀԱՐԹԱԿՆԵՐ > ԶԲՈՍԱՇՐՋՈՒԹՅԱՆ ԵՎ ՔԱՂԱՔԱՇԻՆՈՒԹՅԱՆ ՀԱՐԹԱԿ

ԳՅՈՒՄՐՈՒ ԲԱՐԵԿԱՄՈՒԹՅԱՆ ԱՅԳԻՆ

2018 թ.-ին Զբոսաշրջության և քաղաքաշինության հիմնադրամը (ԶՔՀ) հանդես եկավ Գյումրու Բարեկամության այգու վերականգնման և վերակառուցման նոր նախաձեռնությամբ, որն ասպարեզ իջավ Հիմնադրամի և նրա գործընկերների կողմից 2015 թ.-ից ի վեր աջակցվող և իրականացվող ծրագրերից: Նախագծով ԶՔՀ-ն պարտավորություն է ստանձնում հզորացնելու տեղի համայնքը, խթանելու սոցիալական ու տնտեսական փոփոխությունները և նպաստելու Գյումրու և գալիք սերունդների կայուն ապագային: Սա եզակի նախագիծ է, որն ապահովում է առևտրային, սոցիալական ու մշակութային բաղադրիչների միաձուլումը՝ հիմնվելով պետություն-մասնավոր գործընկերության վրա: Այգին պետք է դառնա այն սակավաթիվ նախագծերից մեկը, որը ներկայացնում է բազմաթիվ դժվարություններ կրած այս քաղաքի վերածնունդը: Այգին նաև խորհրդանշում է բոլոր այն ազգերի ու երկրների հանդեպ մեր երախտագիտությունը, որոնք 1988 թ.–ի երկրաշարժից հետո օգնել են քաղաքի վերածնմանը:

Գյումրու Բարեկամության այգին նպատակ ունի դառնալու Հայաստանում կայուն կանաչ նախագծերի զարգացման նշաձող, որը միավորում է երեք հիմնական ուղղություններ և գործում է ամբողջ տարվա ընթացքում.

ՔԱՂԱՔԱՇԻՆՈՒԹՅՈՒՆ. Այգին էապես կբարձրացնի Գյումրու գոյություն ունեցող քաղաքային ենթակառուցվածքը և կընդլայնի հանրային կանաչ տարածքի ընդհանուր մակերեսը: Բացի այդ, տվյալ տարածքում այգու կառուցումը քաղաքի պատմական կենտրոնը կկապի արդյունաբերական և հիմնական բնակելի գոտիների հետ:

ԶԲՈՍԱՇՐՋՈՒԹՅՈՒՆ. Այգին կավելացնի Գյումրու զբոսաշրջային տեսարժան վայրերը և կդառնա եզակի տարածք միջազգային, տարածաշրջանային և տեղական միջոցառումներ հյուրընկալելու համար, ինչն իր հերթին էապես կմեծացնի դեպի քաղաք այցելուների հոսքը:

ՍՈՑԻԱԼԱԿԱՆ ՁԵՌՆԱՐԿՈՒԹՅՈՒՆ. Այգին կդառնա Գյումրու տեղական ձեռնարկությունների և ստեղծագործական ներուժի ընդունման ու խթանման հարթակ, սոցիալական ու մշակութային կյանքի կենտրոն, որը զբոսաշրջիկներին թույլ կտա իրենց այցելության վայրերի շարքումմեջ նախապատվությունը տալ դրան:

Այգու տարածքի գոտեվորումն առնչվում է անմիջական շրջակայքին: Ժամանցի աղմկոտ գոտիները խմբավորված են այգու արևելյան կողմում, որը շրջապատված է արդյունաբերական տարածքներով, հետևաբար` այս հատվածի աղմուկը չի անհանգստացնի քաղաքի բնակիչներին: Հարավային կողմում՝ հիվանդանոցի մոտակայքում, կա հանգստի գոտի՝ ճեմուղիներով ու նստարաններով: Հյուսիսային կողմում՝ բնակելի շենքերին ավելի մոտ, կան մանկական խաղահրապարակներ ու մարզահրապարակներ` մարզիկների ամենօրյա օգտագործման համար, ինչպես նաև` համայնքային այգի: Այգու տարածքը բաղկացած է երեք գոտուց (քաղաքային գոտի, բնության գոտի և զվարճանքի գոտի), որոնց շնորհիվ ցանկացած տարիքի այցելուները կարող են միաժամանակ օգտվել այգուց:

2021 թ.–ին, հաշվի առնելով ծրագրի կարևորությունը, որպես քաղաքաշինության, զբոսաշրջության և սոցիալական ձեռնարկատիրության միահյուսմամբ հանրային պլանավորման կայուն մոդել, Հայաստանի կառավարությունը հաստատեց այգու հանրային ենթակառուցվածքների աշխատանքների ֆինանսավորումը Համաշխարհային բանկի «Տեղական տնտեսություն և ենթակառուցվածքների զարգացում» վարկային ծրագրի միջոցով: Այս հանգամանքը հավելյալ արժեք է ստեղծում ծրագրի առանցքային նպատակների համար՝ ապահովելով մասշտաբային ցանց` բազմակողմանի շահագրգիռ կողմերի ներգրավման և պետություն-մասնավոր գործընկերության միջոցով։

Հիմնադրամը համագործակցում է միջազգային, մասնավոր և պետական գործընկերների հետ՝ հավաստիանալով, որ բարեկամության գաղափարը գործի է դրվում ծրագրի յուրաքանչյուր փուլում: Գործընկերության առանցքային օրինակներից է «Ազնավուր» հիմնադրամի և Հայ օգնության ֆոնդի հետ այգու տարածքում ժամանակավոր ապրող բնակիչների վերաբնակեցումը: ՄԱԿ-ի Զարգացման ծրագրի (ՄԱԶԾ) հետ համագործակցությամբ, ծրագրի սկզբնական փուլում մշակվել են այգու առաջին հայեցակարգային մտահղացումները, որոնք խորհրդանշում էին բարեկամության գաղափարը:

Բացի այդ, նախագիծն ստացել է Ասիական զարգացման բանկից ներդրումը, որը կենտրոնացած է այգու ներառական նախագծման վրա, մասնավորապես՝ ուղղված մարզական տարածքին: